دنيا هي // قلبك وقلبي //
قلوبنا ..
مدينة كبيرة وحلوة
وزي اي مدينه..
عشان تبقى حلوة لازم نحافظ عليها نظيفه
اوعى تفتح بابه الا للي يستاهل يدخلها
قلبك ده مدينه مفتاحها ملكك وفي ايدك
انت الوحيد اللي مسؤول عن اي زائر يخش
وبردو مسؤول عن اي حاجه تحصل فيه
ايوه
قلبك الابيض وطن
وحلمك مدينة
نظف اي اثر لأي حد تكتشف في يوم انه ميستاهلش ...~
و اوعى تصدق اللي يقولك
ان القلب اوضه واحده بس
وميقدرش يشيل غير بني ادم واحد..
يكونلك هو الحلم والحب وحياتك
عشان يوم مايفاجئك برحيله
متوقفش ساعة الزمن عنده
ولا تنتهي حياتك بعده
قلبك فيه اوض كتير
يتشيل ناس كتير
يعدو ويسكنو فيها
ويمشو ويسيبو وراهم حجات كتير ..~
منهم اللي بيسيب عطر ريحته كل ماتشمها تفتكره
ومنهم اللي بيسيب ورده حمرا
ومنهم اللي بيسيب حلم ناقص النمو يموت بالبطيء مع مرور الوقت
وناس تانيه كتير
بتسيب وراها جرح بينزف
وفي اللي يخلي وراه شعور فظيع بالندم
تتألم منه فترة من الزمن
بس صدقني
بيروح مع الوقت ويتنسي ..
هي دي لعبة النسيان
لعبه بيلعبها الوقت معانا
وبنلعبها احنا مع قلوبنا غصب عننا
لما بنحس ان الذكرى بقت بتأثر على خطوات حياتنا
ومع مرور الوقت
بنتقن اللعبه
ونلعبها مع نفسنا وننسى ونتناسى ..
بس الاكيد
اننا بنزور مدينة قلوبنا
وبنقابل ناس كتير
اللي مخبينهم جوانا
ومقدرش غبار الوقت يمسح ملامحهم
بنسلم عليهم بشوق .. ونحضنهم بحنين .. ونفتكرهم بألم..~
حاجه جميلة اننا نحبهم طول العمر
الاحلى انهم يحبونا طول العمر
عشان ميتحولش احساسنا ليهم نوع من العذاب اللي بنعذب بيه نفسنا ..~
في الوقت اللي هما مش حاسين بينا اصلا ..~
بتوجع اوي
لما تحب حد مش بيحبك
وبتوجع اكتر
لما تحب حد بيحب غيرك
وقتها بتحس ان حبك الجميل بيتحول لزنزانه بتعيش فيها لوحدك
وتحلم فيها لوحدك
وتموت فيها لوحده
ومحدش بيحس بيك .. غيرك ..
اتأسف لقلبك
لو انت في يوم اختارت غلط وكنت سبب فوجعه ودموعه
وحافظ اوي على احلامك الجميله
عشان احنا في زمن بيقتل كل حلم جميل
ومع الوقت بيبقى قلبك مش عارف ولا قادر يحب
وبتفقد حجات كتير اوي
مبتستمرش الحياة للاسف غير بيها..~
شكرا :thankyou:
لكل قلب حبنا
وبرغم الحب سابنا ومشي
وشكر اكبر
لكل قلب اخلص لينا
بس مع اخلاصه مقدرش يحبنا..~
اصلنا ساعات كتير
بنحس بيها .. بس مبنقولهاش
وساعات تانيه
بنقولها .. من غير مانحس بيها ...~
ياترى..!!
اللي عاش في الحياة دي
ومداقش الحب يوم
عارف انه عمره ماعاش..!!!!
كلمات
يمكن ليها علاقه بحاجات
ويمكن بردو ملهمش علاقه ابدا
بس متأكده هيوصلو لقلبو كتير منكم
موضوع: قلبى @@@@@ وقلبك 
السبت مايو 07, 2011 7:50 am
